"عيش و افرح " لمحمد صالح بن عوانة

الدنيا تتبدل و الناس تتبدل و الي كان في نهار يعيطلك حبيبي يجي نهار و معاش يتفكر حتى اسمك .. هاكي طبيعة فينا الناس الكل .. نحبو و نكرهو و ننساو و يتعدى بينى الوقت و نبردو على حاجات كنى في نهار نقولو حياتنى بلى بيها ماتسوى شي .. نجرحو و نتجرحو .. نحبو و نغدرو و نعاشرو و نكرهو ..

ساعات نحس بلي حياتنى الكل نعيشوها و احنى اصلا موش حاسين .. منعرفوش كيفاه الوقت يضيع من بين يدينى .. و حياتنى الكل تتلخص في مجرد لحظات تشمل الفرحة و الحزن و الوحدة ..حتى الموت مجرد لحضة .. حتى مشاعرني الكلها مؤقتة و تتبدل من لحضة لاخرى .. ساعات تلقى روحك فرحان و اللحضة الي من بعدها يتبدل كل شي ..

حياتنى موش معقدة كيف مااحنا نتصورو .. كل شي في الدنيا يتلخص في ''لحضة'' .. يتلخص في الوقت .. الوقت هو ملخص حياتنى ك ''بشر''.. اصلا احنى مجرد لحظات في تاريخ الارض كيف ماكانو غيرنى و الي قبلهم و الاجيال السابقة .. و كيف نركزو نلقاو بلي الوقت يبدل فينا كل شي ..

كيف تخزر لتالي لحياتك .. تلقى بلي كل الي عشتو يتلخص في مشاعر .. و مشاعرنى الكل بيدها مؤقتة ..

عملتنى كبشر هي الوقت .. و هي العملة الوحيدة الي عنى منها و مانعرفوش قداه .. مانعرفوش قداه مازللنا .. كل الي نعرفوه هي مدام احنا عايشين في هال'احظة' مادام مزال عنى الوقت ..

انا .. عشت في حياتي كل الشي .. الفرحة و الخنقة .. الضحكة و التكشيرة و المزيان و الخايب .. و فهمت .. كيف نتعدى كيف تو بلحضات خنقة نخزرلها على مشاعر عابرة و ماندخلش في زيف المشاعر الابدية .. عكس الفرحة الي نعرفها كيف كيف لحضة عابرة اما نعيشها على اساس حاجة ماتوفاش .. نحاول ناخو مالفرحة كل شي و نعيش هاك اللحظات المزيانين كيف مايلزمهم يتعاشو .. موش حاجة عندي منها بزايد ..

Bref .. حبيت نقلكم استغلو العملة الوحيدة الي تنجم تكون عندكم .. برشا ولا شوي مايهمش .. مدام انتي تقرى توا مدام مازال عندك وقت .. ماتاخو معاك شي للقبر .. ماتاخوش معاك احلامك .. حبك .. كرهك .. ماتاخو شي .. عبر مادام مازال عندك الوقت .. احكي .. عيش افرح ..

اعملهم كل .. و انتي حاسس .. ماتخلي حتى لخضة تتعدى منك ماغير ماتحسها ..

محمد صالح بن عوانة