"عينيك بحر " لمحمد صالح بن عوانة

هات همومك نحرقهم في قلبي .. و ايجا نوشملك فرحتي علی جلدك و نزيد نزهيلك الدنيا بكلمتك .. ايجا نصنعلك مالغبار شراره تقويك .. و نهبطلك مالسماء غيمه اطيرك و تنجيك .. نكتبلك بدمي سطور طويله و نزيدها نقشه مزيانه .. و نكبش في يديك كالعزوز الخرنان..

و الا نقلك .. ايجا و اش عليك .. كان وحلت بش انسيك في همومك هام عينيا يبكيو مع عينيك .. نعبيو منهم بحر  .. نعومو و نتبحبحو فيه و نغرقو فيه بكانا و نخرجو لباس علينا .. نكتبلك علی كل كعيبه رمل نكته و نخليلك ورا كل ضحكه سكته .. تنسيك في اللي وراك و اللي قدامك .. مش تحب تنسی ? ,, ايجا حط راسك علی كتفي و عدي تخمامك لمخي .. مالا انا علاش لنا .. ايجا نحكيلك حاجات مش بش يصيرو ..

ملايكه مزيانه تطلعلنا عقاب الليل تمدلنا شكلاطه و نلحسو صوابعنا كالصغيرات من كثر ماهي بنينه .. و الا قطيطسه صغيره ادور عالشط هي و وليداتها يعومو شويا و كي يتبلو يجيو يشيحو رواحهم علينا .. و الا شقولك كان نحكيلك عالبنوته الصغيره اللي تشبه للقمره في زينها ..

و طول شعرها اللي عاملتو كياس توصل بيه للنجوم توشوشلها و تجي تحكيلنا .. اتكی اتكی خ نزيد نحكيلك عالمرا  الكبيره المحلاها اللي ريحتها مسك و عنبر و عالخلخال اللي مواتاها .. و الوشمه قديمه علی جبهتها و ريحانتها الفضه اللي باللي يصير ما تعطيها .. ياا شو اش جابلنا البحر .. شويه لوح قديم .. تي باز حب يقص علينا حكاياتنا خاطر نغر .. يااا تطلعشي بقيه فلوكه تيتانيك جابهالنا الماء .. حب يورينا اللي هنا الحب بدا عالبحر و هنا زادا وفا .. ايجا نلمو هاللوحات و نصنعو بيهم دويره عالشط كيما في الافلام .. و نزيدوها شمينيه مزيانه و توليلي رسامة.. ننقشو عليها اسامينا بركا و نخليو من روحنا بالاقلام .. تا نقول لقطيطستنا تصطادلنا كعيبات حوت .. و نشويوهم علی ضو الشميسه و نعليو بغنانا الصوت ..

مازالت مهمومة? ,,  تي هاي روحي هزها عندك و تا نطلع انا نعيش بحذا النجوم ..

نحب نقلك بارشا كلام

اما قدام عينيك يهرب لكلام

و الفم اللي كان يهتري يبكام

و القلب لي كان مخبي كدس كلام ملام كي يشوفك يهدى و يطمان

اماا انا قررت بش نكتبلك

فماش مل الكلام يخرج مني و فيسع يوصلّك مايهمش كان بطا في الثنيّة تو كي يوصل يفسّرلك

و جيبلك صوتي يجيك يشوشولك في وذنك و يقلّك

نحب نكتبلك اليوم و غدوة و حتى البارح

نحب نبقى نخزرلك و المخ سارح

اي ماني كي نكتب نخرج أفكاري و نخليك تعرف خنّاري

نحكي عليك ماك نتي داري و ناري و بااارشا هداري

نتي نجمتي لي تضوي لياليّا

نحب نمشي معاك لبعيد و نضيعو في الثنيّة

اليد في اليد لين تتعب ساقيّا و تذبل عينيّا

و نوشوشلك و نقلك نتي أهلي و ماليّا

في وسط الحداثة نتي خرافة زمنيّة

في عزّ الشتا نتي شمس الصبحيّة

نتي نسمة كافيّة في ليالي صفيّة

و في عزّ الليل نتي نجمة قطبيّة

مخ غريب عجيب ينسى و ينسى و ينسى

و حاجة جات منك عمرو ما ينسى

عشا البارح نسيتو

اماا

مانسيتش عدد النمشات لي مزينة وجناتك ،عدد شاماتك

منسيتش أوقات كلامك و حتى سكاتك

فيبالك

نومي يطير كي يتعدا بين عينيا طيف خيالك

نبقا نخمم زعما في اللحظة هذي جيت على بالك

و نعدي ليلي نغني في غناك و موّالك

نتي أحلى تشنشينة

و بارشا حاجات بنينة

نتي البحر و نتي المينا

و القلب الأبيض فارينة

نتي ورد فايح في جنينة اما مش اي جنينة

نتي احلى وردة في جنينة بايات

العمر الجاي و العمر لي فات

نتي لي كي دخلت ل حياتي أحزانها مشات

و التصويرة لي كانت مدغدشه كي جيت نتي صفات

دنيتي حلّيتها بوجودك و كي زينتها زادت حلات

نتي الغمازة لي تزين البسمات

نتي حلمة ماتوفاش

نتي احساس جميل مايتوصفش اما يتعاش

نتي هدرة ماتتنساش

نتي سرّ مايوفاش

حياتنا نعيشوها ك الحلمة

نسهروا كل ليلة على ضو الڨمرة

تعرفني نحب الڨمرة

اما تعرف لي نتي بلوة !

اي بلوة مزيانة و كلها فيانة

بلوه تفيض بالحنانة

تبسيمتك نحبها ليّا انا

و لخلافي انا نولي خرنان

وتولي تضحك و تعيطلي امي منّانة

نحبك كي نبدا نتبولد و نعمل عليك جوّ

و نجيك في وسط الظلمة و نقلك بَوّْ

نحب نقرالك كتابي

و تفهم بيه لي بُعدك عذابي

و نقلك ماتسيبنيش مهما كانت اسبابي

نحبك كيما نحب بلادي و لا نقلك :نتي بلادي

محمد صالح بن عوانة